काठमाडौं । सैनिक श्रीमती संघले मध्यपुरथिमि नगरपालिका ९ बोडेमा बस्दै आएका कोरोना सङ्क्रमित एकाघरका १४ जना परिवारलाई खाद्यान्न वितरण  गरेको छ । संघले पीडित परिवारलाई तीनमहिनालाई पुग्ने खाद्य सामाग्री प्रदान गरेको हो ।
    
रामेछापबाट सातवर्ष अगाडि बोडेमा जग्गा भाडामा लिएर टहरा हालेर बस्दै आएका चारदिन र तीन महिनाको सुत्केरी, ७, ८ र ९ वर्षका बालवालिकादेखि ७५ वर्षीया जेष्ठ महिला समेत कोरोना सङ्क्रमित भएपछि समस्यामा परेका थिए । सङ्क्रमित सो परिवारलाई स्थानीयले एम्बुलेन्समा राखेर खरिपाटीस्थित आइसोलेशनमा पठाएका थिए । आइसोलेशनले पनि सोही राती  नै पुनः सोही टहरामा मै फर्काइदिएको थियो । यसपछि उक्त परिवारलाई मानसिक तनावका साथै खाद्यान्नको अभावमा परेका विषयमा राससले समाचार सम्प्रेषण गरेको थियो । 

सङ्क्रमित परिवारमा खाद्यान्न अभाव नहोस भन्ने उद्देश्यले संघले टहरामा होम आइसोलेशन मै रहेका ती परिवारलाई खाद्यान्नसहितको सामाग्री प्रदान गरेको वीर दल सूर्यविनायकका गणपति एवं प्रमुख सेनानी शिवप्रसाद पौडेलले जानकारी दिए ।  

गणपति प्रमुख सेनानी पौड़ेल तथा वडाध्यक्ष रामकाजी चक्रधरको रोहवरमा संघले १० बोरा चामल, एक/एक बोरा गेडागुडी, आलु र  नून, एक बक्सा तेल, दुई/दुई केजी बेसार,  मेथी, ज्वानोे, हर्लिक्स,  बोर्न भिटा , चार बट्टा ल्याक्टोजिन, सुत्केरी तथा नवजात शिशुलाई न्यायो कपडा, पौष्टिक आहारा तथा गणले स्यानेटाइजर, मास्क र जुस प्रदान गरेको हो । संघले गरेको यस सहयोगले परिवारमा ठूलो राहत पुगेको सङ्क्रमितका परिवारले जनाएका छन् ।