काठमाडौं । काभ्रेको धुलिखेल अस्पतालले कोरोना भाइरस संक्रमणको उपचार वापत लाग्ने शुल्क सार्वजनिक गरेको छ । अस्पताल प्रशासनले एक सूचना जारी गर्दै कोरोना संक्रमितका उपचार वापत लाग्ने शुल्क सार्वजनिक गरेको हो । 

कोरोना संक्रमण भई उपचाररत बिरामीलाई भर्ना हुनुअघि ५० हजार देखि २ लाख रुपैयाँसम्म नगद धरौटी राख्न सूचनामा भनिएको छ । स्वास्थ्य तथा जनसंख्या मन्त्रालयको निर्णयअनुसार भन्दै संक्रमितलाई भर्ना हुनुअघि अस्पतालको नगद शाखामा धरौटी राख्न आग्रह गरिएको छ । 

अस्पतालले सामान्य लक्षण भएकासँग ५० हजार, मध्य जटिल बिरामीसँग १ लाख र आईसीयूमा राख्नुपर्ने बिरामीसँग २ लाख रुपैयाँ धरौटी माग गरेको हो । त्यसमा औषधी तथा रोग निदानमा प्रयोग हुने जाँचको थप रकम लाग्ने पनि खुलाएको छ ।

अस्पतालमा उपचार खर्च भने सामान्य लक्षण भएकालाई दिनमा ३५ सय, मध्य जटिल समस्या भएकालाई ७ हजार ५ सय र आईसीयूमा भर्ना गर्नुपर्ने बिरामीलाई १५ हजार शुल्क लाग्नेछ । यही रकमले अस्पतालले खाना खुवाउने जनाइएको छ ।