काठमाडौं । नेपाल र भारतमा पूर्ण रूपमा कोभिड–१९ खोप लगाएका मानिसहरूको यात्रालाई सहज बनाउने उद्देश्यले नयाँ दिल्ली र काठमाडौंले मंगलबार कोभिड खोप प्रमाणपत्रको पारस्परिक मान्यताका लागि एक समझदारी पत्रमा हस्ताक्षर गरेका छन्।

भारतको स्वास्थ्य तथा परिवार कल्याण मन्त्रालय र नेपालको स्वास्थ्य तथा जनसङ्ख्या मन्त्रालयले कोभिड खोप प्रमाणपत्रको पारस्परिक मान्यताका लागि समझदारी पत्रमा हस्ताक्षर गरेको नेपालस्थित भारतीय दूतावासले जनाएको छ ।

यसका साथै भारत र नेपालबीच स्थापित कोभिड-१९ सम्बन्धी बलियो सहयोग र समन्वयमा अर्को महत्वपूर्ण उपलब्धि हासिल भएको छ।‌ महामारी सुरु भएदेखि भारतले नेपाललाई अत्यावश्यक औषधि, आरटिपिसिआर परीक्षण, भेन्टिलेटर र अत्यावश्यक औषधिको आपूर्ति गरिरहेको छ। हालसम्म भारतले नेपाललाई करिब ६५ लाख अमेरिकी डलर बराबरको अनुदान सहयोग उपलब्ध गराएको छ ।

यस वर्षको जनवरी महिनामा भारतबाट कोभिशिल्ड खोपको १० लाख खुराक अनुदान स्वरुप प्राप्त गर्ने नेपाल पहिलो देश हो । यसका साथै भारतीय सेनाले नेपाली सेनालाई बिपाप मेसिन, एन्टिजेन किट, पीपीई, मास्क, एम्बुलेन्स र आईसीयू बेड लगायतका स्वास्थ्य सामग्री अनुदान स्वरुप प्रदान गरेको थियो। यसका साथै कोविड खोपको १ लाख खुराक पनि उपलब्ध गराएको थियो।

एम्बुलेन्सको आपूर्ति, स्वास्थ्य क्षेत्रमा नियमित तालिम र क्षमता अभिवृद्धि कार्यक्रमहरू र प्रमुख अस्पतालहरू, ट्रमा र प्रसूति केन्द्रहरू, प्राकृतिक चिकित्सा केन्द्रहरू, र आँखा हेरचाह केन्द्रहरू लगायत स्वास्थ्य पूर्वाधारको विकास लगायत स्वास्थ्य क्षेत्रमा भारत र नेपालबीच बलियो सहकार्य छ।

भारतले आफ्नो छिमेकी राष्ट्र सँग कोभिड–१९ सहकार्य गर्ने प्रतिबद्धता जाहेर गरेको थियो। सोही अनुसार भारतले जुलाई महिनामा नेपाललाई १ सय ५० आईसीयू बेड हस्तान्तरण गरेको थियो। भारतले अगस्ट महिनामा नेपाललाई ९ सय ६० लिटर प्रतिमिनेट क्षमताको चिकित्सा अक्सिजन प्लान्ट पनि हस्तान्तरण गरेको थियो जसले एकैपटक २ सय बिरामीलाई सेवा दिन सक्छ ।