काठमाडौं । जनकपुर–पोखरा सिधा हवाई उडान सेवा शुरु हुने भएको छ ।  पहिलो चरणमा बुद्ध एयरले उडान गर्दै छ । आज शनिबार हुने पहिलो उडानमा गण्डकीका मुख्यमन्त्री कृष्णचन्द्र नेपाली जनकपुर आउने कार्यक्रम रहेको छ ।  मुख्यमन्त्री नेपालीलाई जनकपुरमा मधेस प्रदेशका मुख्यमन्त्री लालबाबु राउतले स्वागत गर्नेछन् । जनकपुरधामको जानकी मन्दिर, विवाहमण्डप लगायतको अवलोकन गर्ने कार्यक्रम छ । 

यसअघि मधेशका मुख्यमन्त्री राउत गत असोज ६ मा पोखरा भ्रमणमा गएका थिए । सप्ताहमा तीन उडान गरिने तयारी गरिएको छ । यात्रुको चाप बढे उडान सेवासमेत थप हुने जनाइएको छ । कोरोना महामारीका कारण दुई वर्षदेखि जनकपुर–पोखरा उडान स्थगित थियो ।

साताको तीन दिन मंगलबार, बिहीबार र शनिबार जनकपुर–पोखरा हवाई उडान हुने बुद्ध एयरले जनाएको छ । पोखरा जनकपुरमा हवाई उडान अवधि ४५ मिनेटको हुने छ ।