सिमेन्ट बोकेको ट्रक त्रिशूलीमा खस्यो, चालकको मृत्यु

आर्थिकन्यूज
आइतबार, ११ फागुन २०७६

धादिङ । धादिङको बेनिघाट रोराङ गाउँपालिका ९ ज्यामिरेघाटमा ट्रक दुर्घटना हुँदा चालकको मृत्यु भएको छ । दुर्घटनामा मकवानपुरको भैंसे बस्ने ४६ वर्षीय बिखे थोकरको मृत्यु भएको हो ।

थोकरको गजुरी अस्पतालमा उपचारको क्रममा आइतबार बिहान करिब पाँच बजेतिर मृत्यु भएको जिल्ला प्रहरी कार्यालय धादिङले जनाएको छ ।

सिमेन्ट बोकेर वीरगञ्जबाट बनेपा जाँदै गरेको ना ५ ख ३७७७ नम्बरको ट्रक आइतबार बिहान करिब सवा तीन बजे त्रिशुली नदीमा खसेको थियो । टायर पड्किएपछि ट्रक अनियन्त्रित भएर सडकबाट करिब एक सय मिटर तल खसेको प्रहरीले जनाएको छ ।