काठमाडौं । मोबाइल सेवाको विस्तार र सेवा प्रदायकको पहुँच बढेसँगै ६० प्रतिशत नेपालीको मोबाइलसँगै हातहातमा इन्टरनेटको पहुँच पुगेको छ । नेपाल दूरसञ्चार प्राधिकरणले केन्द्रीय तथ्यांक विभागको दुई करोड ९५ लाख १४ हजार जना नेपालीलाई आधार मानेर तयार पारेको तथ्यांक अनुसार मोबाइल तथा इन्टरनेट प्रयोगकर्ता नेपालीको हिस्सा ६० प्रतिशत पुगेको छ ।

प्राधिकरणले बैशाखमा सार्वजनिक गरेको पछिल्लो तथ्यांक अनुसार कुल इन्टेरनेट प्रयोगकर्तामध्ये ४६ प्रतिशत मोबाइलबाट, १.२३ प्रतिशत मात्रै ताररहित फिक्स्ड ब्रोडब्यान्डबाट र १२.१ प्रतिशतले भने तारसहिको फिक्स्ड ब्रोडव्यान्ड इन्टरनेट प्रयोग गर्ने गरेको उल्लेख छ ।

प्राधिकरणको तथ्याक अनुसार इन्टरनेट चलाउने नेपाल टेलिकमका ग्राहक संख्या ८३ लाख ३५ हजार ९६० जना छन् । एनसेलबाट इन्टेरनेट चलाउने यस्तो ग्राहकको संख्या भने ६३ लाख १२ हजार १६३ जना रहको तथ्यांकमा उल्लेख छ ।

इन्टरनेट सेवा प्रदान गर्नेमा नेपाल स्मार्ट टेलिकमको एक लाख ३९ हजार २४२ मात्रै रहेको छ भने बाँकी २७ लाख ८२ हजार ५९ जना ग्राहकले भने इन्टरनेट सेवा प्रदायक कम्पनीहरूको इन्टरनेट सेवा उपयोग गर्ने गरेका छन् । इन्टरेनट सेवा प्रदायक संस्था वा मोबाइल सेवाबाट नेपालमा डाटाको पहुँचमा १ करोड ७५ लाख ६९ हजार ४२४ जना पुगेका छन् । 

इन्टरनेट सेवा प्रदायकको संख्या बढेको भएपनि द्रुत गतिको इन्टरनेटको सेवाको वृद्धिदर भने निकै कम छ । १ करोड ७५ लाखको इन्टरनेट पहुँचमध्ये पछिल्लो समय चौथो पुस्ताको मोवाइल इन्टरनेट फोरजी चलाउनेको संख्या जम्मा २७ लाख ९१ हजार ८१९ जना मात्रै रहेका छन् । बाँकी एक करोड सात लाख ३३ हजार ६६५ जना ग्राहकले भने थ्रीजी नै उपयोग गरिरहेका छन् । 

फोरजी सेवा लिँदा द्रुत गतिको इन्टरनेट चल्ने र यसको उपयोग गर्न स्मार्ट फोन अनिवार्य छ । कम्तिमा १० हजार रुपैयाँका मोवाइल सेटमा फोरजी चल्ने र यसको उपभोग गर्न स्मार्ट फोन प्रयोगकर्ताले आफ्नो सीमकार्ड पनि अपडेड गरानुपर्छ । 

पछिल्लो समय फोरजी सेवा दिनेमा नेपाल टेलिक, एनसल र स्मार्ट टेलिकम रहेका छन् । यसमध्ये टेलिकमका फोरजी प्रयोगकर्ता ७ लाख २७ हजार मात्रै छन् । यसका थ्रीजी मोबाइल डाटा प्रयोगकर्ता भने ६३ लाख ४६ हजार रहेको छ ।

फोरजी सेवामा अग्रणी बनेको एनसेलको प्रयोगकर्ता भने १९ लाख २५ हजार पुगेको छ । यसका कुल थ्रीजी प्रयोगकर्ता ४३ लाख ८६ हजार रहेका छन् ।

यस्तै स्मार्ट टेलिकमका पनि १ लाख ३९ हजार प्रयोगकर्ताले फोरजी चलाउने गरेका छन् । यसको थ्रीजी प्रयोगकर्ता भने छैनन् । यो टेलिकम कम्पनीले टुजीबाट एकैपटक द्रुत गतिको मोबाइल इन्टरनेट सेवा सुरू गरेको हो । 

यस्तो छ नेपाल दूरसञ्चार प्राधिकरणले जारी गरेको इन्टरनेट सेवाको तथ्यांक