कोरोनाबाट थप एक जनाको मृत्यु

आर्थिकन्यूज
आइतबार, ३२ जेठ २०७७

काठमाडौं । नेपालमा कोरोना भाइरसका कारण थप एक जनाको मृत्यु भएको छ । गुल्मीको रेसुंगा नगरपालिकाको आइसोलेसनमा उपचार गराइरहेका धुर्कोट गाउँपालिका ४ जैसिथोकका ३६ वर्षीय पुरुषको शनिबार राति मृत्यु भएको हो ।

उपचारमा खटिएका एक चिकित्सकका अनुसार उनमा जेठ १२ कोरोना संक्रमण पुष्टि भएसँगै रेसुंगा नगरपालिकाको आइसोलेशनमा राखेर उपचार गरिएको थियो। उनी २ वर्षदेखि क्यान्सर रोगले पीडित थिए। स्वास्थ्य गम्भीर हुँदै गएपछि यसअघि उनको उपचारमा संलग्न स्वास्थ्यकर्मीले नै रगत दिएकी थिइन् । उनी आइसोलेशनको बेडमा जान र झर्न नसक्ने भएपछि भुँइमै राखेर उपचार गरिएको थियो।