हावाहुरीले विद्यालयको छानाे उडायो

आर्थिकन्यूज
आइतबार, २६ जेठ २०७६

गएराति आएको हावाहुरीले बैतडीको पाटन नगरपालिका–९ स्थित सिद्धेश्वर माविको छाना उडाएको छ ।

विद्यालयको तीन कोठे भवनको छाना हावाहुरीले उडाउँदा २ लाख ५० हजार रुपैयाँ बराबरको क्षति भएको विद्यालय व्यवस्थापन समितिका अध्यक्ष प्रेम भाटले जानकारी दिए ।

टीनको छाना उडाउँदा २६ बोरा सिमेन्टलगायत विभिन्न शैक्षिक सामग्री भिजेर नष्ट भएको छ । हावाहुरीले भवनको छाना नै उडाएपछि पठनपाठनसमेत प्रभावित भएको छ ।

२०१८ सालमा स्थापना भएको यो विद्यालयमा ३ सय ५ जना विद्यार्थी अध्ययनरत छन् । हावाहुरीले पाटन नगरपालिका–८ खोडपेमा रहेको भगवती महिला बहुउद्देश्यीय कृषि सहकारी संस्था र अन्य दुई घरको छाना पनि उडाएको छ ।