एजेन्सी । भारतको गुजरात र हिमाचल प्रदेशको विधानसभा चुनावको नतिजा आज आउनेछ । जरातको कुल १९२ विधानसभा सीटहरूको लागि डिसेम्बर १ र डिसेम्बर ५ मा दुई चरणहरूमा मतदान गरिएको थियो। सरकार बनाउन कुनै पनि दलले कम्तीमा ९२ सिट जित्नुपर्ने हुन्छ ।

भारतीय जनता पार्टी गुजरातमा विगत २७ वर्षदेखि सत्तामा छ र यदि एक्जिट पोललाई विश्वास गर्ने हो भने फेरि एकपटक भाजपाको सरकार बन्ने सम्भावना छ । भारतीय टिभी च्यानलहरूमा प्रसारित अधिकांश एक्जिट पोलका अनुसार बीजेपीले सजिलै बहुमत प्राप्त गरिरहेको छ र ११७ देखि १५१ सिट जित्न सक्छ।

यद्यपि चुनावको एक्जिट पोल प्रत्येक पटक सही साबित हुँदैन। तर गुजरात प्रधानमन्त्री नरेन्द्र मोदी र गृहमन्त्री अमित शाहको गृह राज्य हो र यहाँ भाजपा परम्परागत रूपमा बलियो स्थितिमा रहेको छ। गुजरातमा अहिलेसम्म मुख्य प्रतिस्पर्धा भाजपा र कांग्रेसबीच मात्र भएको छ ।

२०१७ मा भएको पछिल्लो चुनावमा, बीजेपीले ९९ सीट जितेको थियो र अघिल्लो चुनावको तुलनामा १६ सीट गुमाएको थियो। अर्कोतर्फ, कांग्रेसले गत निर्वाचनको तुलनामा कडा संघर्ष गर्दै ७७ सिट जितेको थियो र १६ सिटको अग्रता लिएको थियो ।

तर यस पटक आम आदमी पार्टी पनि मैदानमा छ । जसले अहिलेसम्म दिल्ली र पञ्जाबमा कांग्रेसबाट सत्ता खोसेको छ। आम आदमी पार्टीले गुजरातमा आक्रामक चुनावी अभियान सुरु गरेको छ र भारतको यो पश्चिमी प्रान्तमा राजनीतिक मैदान निर्माण गर्ने प्रयास गरेको छ।