बर्दिया । बीमा दाबी गर्ने मनासयले बर्दियाका रामु चौधरीले आफ्नै गाडीमा आगजनी गरेका छन्  । बीमाको पैसा पाइन्छ भनेर लु २ ख २०८४ नम्बरको फोर्स गाडीमा उनले आगजनी गरेको प्रहरीको भनाई छ । उक्त अभियोगमा गाडीका चालक मधुबन नगरपालिका २ गंगापटुवा बस्ने चौधरीलाई सोमबार बिहान प्रहरीले पक्राउ गरेको हो ।

मधुबन नगरपालिका ४ बसन्तास्थित माचड चोकदेखि भुरिगाउँ जोड्ने पक्की सडकमा गएराति उक्त गाडीमा आगलागी भई पूर्ण रूपमा जलेर नष्ट भएको थियो । ईलाका प्रहरी कार्यालय ढोढरीबाट खटिएको प्रहरीले घटनाको अनुसन्धान गर्ने क्रममा उक्त गाडीका चालक चौधरीलाई नियन्त्रणमा लिई सोधपुछ गर्दा उनको संलग्नता रहेको खुल्न आएको हो ।

माघ २० गते उक्त गाडी बिग्रिएकोले मर्मतको लागि ग्यारेजमा लगेको र मर्मत गर्न बढी रकम लाग्ने हुँदा चौधरीले बिमा दाबी गर्ने मनसायले गाडीलाई आइतबार राति उक्त स्थानमा लगेर डिजल छर्की आगो लगाएको प्रारम्भिक अनुसन्धानको क्रममा खुल्न आएको छ । यस सम्बन्धमा प्रहरीले थप अनुसन्धान गरिरहेको छ ।