एजेन्सी । अमेरिकी अधिकारीहरूले त्यहाँको एक टेक फर्म सीगेटलाई चीनको हुवावेलाई हार्ड डिस्क ड्राइभ बेचेकोमा कारबाही गरेको छ । सो कम्पनीलाई उसले निर्यात नियन्त्रण उल्लङ्घन गरेको आरोपमा तीन सय मिलियन डलर जरिवाना लगाएको हो ।

सीगेट टेक्नोलोजीले सन् २०२० मा निर्यात नियन्त्रण लागू गरेपछि हुवावेलाई १.१ बिलियन डलरभन्दा बढीको सामान पठाएको त्यहाँको वाणिज्य विभागले जनाएको छ। यो जरिवाना अमेरिकी सरकारले चीनलाई अत्याधुनिक प्रविधिको बिक्री रोक्नको लागि चलेको पछिल्लो कदम हो।

अमेरिकी अधिकारीहरूले त्यस्ता उपकरणहरू चिनियाँ सेनाले प्रयोग गर्न सक्ने बताएका छन्। वाणिज्य विभागका अनुसार पूर्व राष्ट्रपति डोनाल्ड ट्रम्पको प्रशासनले नियम लगाएपछि सीगेटले हुवावेलाई करिब एक वर्षसम्म ७.४ मिलियन ड्राइभ पठाएको थियो।

विभागको उद्योग र सुरक्षा ब्युरो का म्याथ्यू एक्सेलरोडलाई उद्धृत गर्दै समाचार माध्यमहरूले उल्लेख गरेका छन्, "हाम्रो राष्ट्रिय सुरक्षाको लागि प्रतिकूल आचरण हुने गरि हुवावेलाई संस्थाको सूचीमा राखेपछि पनि यसले त्यसो गर्न जारी राख्यो।"

'हुवावेका अन्य दुई मुख्य हार्ड ड्राइभ आपूर्तिकर्ताहरूले नयाँ नियम अनुसार चिनियाँ फर्मलाई निर्यात रोकेका थिए', विभागले भन्यो।

यो जरिवाना आगामी पाँच वर्षसम्मको लागि प्रत्येक तीन महिनामा १५ मिलियन डलरको किस्तामा भुक्तानी गरिनेछ, सीगेटले भनेको छ। अमेरिकाले चीनमा उन्नत कम्प्युटर चिप्स जस्ता प्रविधिको बिक्रीलाई रोक्नको लागि आफ्नो अभियान जारी राखेको बेला यस्तो समाचार बाहिर आएको हो।

हुवावेलाई राष्ट्रिय सुरक्षा र विदेश नीतिको चिन्ताका कारण अमेरिकी सामानको बिक्री कटौती गर्ने वाशिंगटनको प्रयासको एक भागको रूपमा सन् २०१९ मा अमेरिकी व्यापार प्रतिबन्धको सूचीमा राखिएको थियो।

वाशिंगटनले यो प्रविधिलाई चिनियाँ सेनाले मानवअधिकार उल्लङ्घनलाई समर्थन गर्न सक्ने वा अन्य तरिकाले अमेरिकी राष्ट्रिय सुरक्षालाई खतरामा पार्न प्रयोग गर्न सक्ने बताएको छ।चिनियाँ सरकारले बारम्बार आरोप अस्वीकार गर्दै आएको छ।

हालैका वर्षहरूमा धेरै पश्चिमी देशहरूले सुरक्षा डरका कारण चिनियाँ प्रविधि कम्पनीहरू विरुद्ध कदम चालेका छन्। हुवावे, जेटटीई र ह्याटेरा जस्ता फाइभ-जी  प्रविधिमा विशेषज्ञता हासिल गर्ने कम्पनीहरूलाई अमेरिका, अष्ट्रेलिया, जापान, भारत र क्यानडामा नेटवर्कमा उपकरण जडान गर्न प्रतिबन्ध लगाइएको छ।

यसैबिच, बेलायत सरकारले हुवावेद्वारा जडान गरिएका उपकरणहरू सन् २०२७ सम्ममा फाइभ जी नेटवर्कहरूबाट हटाउन आदेश दिएको छ।

यस हप्ताको सुरुमा, चिनियाँ सिसिटिभी कम्पनी हिकभिजनले चिनियाँ जासुसीलाई सक्षम बनाउन अमेरिकी सरकारलाई बेचेका आफ्ना उत्पादनहरूमा अवैध रूपमा सफ्टवेयर राखेको कुरा अस्वीकार गर्‍यो। भर्खरै लीक भएको पेन्टागन कागजातमा खुलासा गरिएका आरोपहरूको बारेमा बीबीसीको प्रश्नहरूको जवाफ दिँदै कम्पनीले त्यो अस्वीकार गरेको हो।