काठमाडौं । ९२ वर्षअघि भारतको सहयोगमा निर्माण गरी ३५ वर्षसम्म सञ्चालन भएको परवानीपुर–अमलेखगन्ज रेलमार्गको जग्गा वर्षौँदेखि व्यक्ति र संस्थाले कब्जा गरेका छन् । त्रिभुवन राजपथ निर्माण भएको तीन वर्षपछि ०२२ मा रेल सञ्चालन बन्द भएसँगै ४२ किमि रेलमार्गको जग्गा अतिक्रमणमा परेको हो । त्यतिवेला रेल्वेको सम्पत्ति नेपाल यातायात संस्थानकै स्वामित्वमा थियो । 

पूर्व र बहालवाला सांसदहरूबाटै रेलमार्गको जग्गा अतिक्रमणमा परेको हो । परवानीपुरमा रेलमार्गको १० धुर जग्गा अतिक्रमण गरी पूर्वसभासद नज्मा खातुनले पक्की घर ठड्याएकी छिन् । खातुनको घर भएको १२ धुर जग्गामध्ये १० धुर रेलमार्गको भएको अनुसन्धानमा भेटिएको अख्तियार दुरुपयोग अनुसन्धान आयोग हेटौँडा कार्यालयले जनाएको छ । खातुनको परिवार अहिले यही घरमा बस्दै आएको छ । 

यस्तै, प्रदेश–२ कि बहालवाला सांसद सीता गुरुङले पनि अमलेखगन्जमा रेलको संरचना अतिक्रमण गरेर घर बनाएकी छिन् । कर्मचारीका लागि बनाइएको भवन भएकै ठाउँमा जग्गा अतिक्रमण गरेर घर बनाएकी हुन् । अमलेखगन्जमा तत्कालीन समयमा बनाइएको कर्मचारीको भवन र वाल भत्किएपछि सोही ठाउँमा मिचेर गुरुङले घर बनाएको अख्तियार स्रोतले जनायो । अख्तियारले अतिक्रमित जग्गाको विस्तृत विवरण लिइसकेको छ । 

०३३ पछि ०५० सम्म व्यक्ति र संस्थाहरूबाट रेल्वेको जग्गा अतिक्रमण भएको अख्तियारको छानबिनमा खुलेको छ । अख्तियार हेटौँडा कार्यालयका अनुसार २२ असार ०७१ देखि अख्तियार केन्द्रले प्रारम्भिक अनुसन्धान गरे पनि १ साउन ०७५ मा केन्द्रमा उजुरी परेपछि हेटौँडा कार्यालयबाट विस्तृत अनुसन्धान सुरु भएको हो । 

टिकट घरमा बाख्राको खोर
परवानीपुर–अमलेखगन्ज रेलमार्गका लागि निर्माण गरिएका टिकट घर, स्टोर, कार्यालय भवन, कर्मचारी भवन र रेल लिक सबै अतिक्रमणमा परेका छन् । रेल लिकका संरचना बेचिएका थिए । सिमरा स्टेसनमा रहेको टिकट घरमा प्यारीमैंया क्षेत्रीले बाख्राको खोर बनाएको भेटिएको अख्तियारले जनाएको छ । 

यस्तै सिमराकै टिकटघरमा ०७० देखि मानव अधिकारका लागि एकल महिला समूह छहारी सञ्चालनमा छन् । सिमरास्थित कर्मचारी आवासमा आत्मज्ञान प्रचार संघ राखिएको छ । अमलेखगन्जको स्टोरमा ०६२ देखि अमलेश्वर उपभोक्ता समितिको कार्यालय सञ्चालनमा छ । अमलेखगन्ज स्टोर ०५८ देखि नवसिर्जना बचत तथा ऋण सहकारी संस्था लिमिटेडले पनि अतिक्रमण गरेर कार्यालय बनाएको अख्तियारले जनाएको छ । नयाँ पत्रिका दैनिकबाट ।