काठमाडौँ। दसैँमा चिनीको चरम अभाव व्यहोरेका नेपालीले तिहारमा भने गुलिया मिठाई खान पाउने भएका छन् । भारतबाट तिहार अघि नै जीटुजी प्रक्रिया मार्फत २५ हजार मेट्रिक टन चिनी सरकारले आयात गर्ने तयारी थालेसँगै यस्तो सम्भावना देखिएको हो ।

वाणिज्य मन्त्रालय स्थित स्रोतका अनुसार नेपाल प्रहरी समेत खटाएर सो चिनी तिहार अघि नै नागरिकको भान्सासम्म पुर्‍याउने गरी योजना बनाइएको छ । नेपालका चिनी उद्योगहरूसँग समेत समन्वय गरेर सरकारले देशव्यापी चिनीको आपूर्ति गर्ने तयारी गरेको हो ।

प्रमुख चाडहरूमा चिनी समेत उपलब्ध गराउने नसक्ने भन्दै यसबिच सरकारको कडा आलोचना भएपछि मन्त्रालयले यस्तो अग्रसरता देखाएको हो । यसमा नेपाल प्रहरीलाई सादा पोसाकमा खटाउने र प्रशासन समेत पूर्ण रुपमा सक्रिय बन्ने गरी योजना बनाइएको मन्त्रालयले जानकारी दिएको छ ।

हाल गोदाम चिनी लुकाएर कालोबजारी गरिरहेकाहरू सँग रहेको अवैध चिनी जफत गर्न पनि सादा पोसाकका प्रहरी र प्रशासनको टोली तयार गरिएको र सो काममा तुरुन्तै सक्रियतापूर्वक लाग्ने मन्त्रालय स्रोतले जनाएको छ । स्मरण रहोस्, दसैँमा आम नागरिकले प्रतिकेजी १६० रुपैयाँसम्म तिरेर चिनी उपभोग गरेका थिए । सो मूल्यमा समेत सहज रुपमा चिनी उपलब्ध नहुँदा जना आक्रोश निकै नै बढेको थियो ।