मेडिकल कलेजले उडाएको अवैध शुल्क फिर्ता नगरे कारबाही

आर्थिकन्यूज
सोमबार, ०९ मंसिर २०७६

काठमाडौं । गृहमन्त्रालयले मेडिकल कलेजहरुले अवैध रुपमा असुलेको शुल्क फिर्ता फिर्ता गर्न २४ घण्टे अल्टिमेटम दिएको छ । सोमबार गृहमन्त्रालयमा शिक्षामन्त्री,महान्यायाधीवक्ता अग्नि खरेल र मेडिकल कलेज सञ्चालकबीचमा भएको छलफलपछि सरकारको यस्तो निर्देशन आएको हो ।

यसभन्दा पहिला सरकारले मेडिकल कलेजहरुलाई शुल्क फिर्ता गर्न दिएको १५ दिनको अल्टिमेटम सोमबार सकिएको छ । तर, कुनै पनि कलेजले विद्यार्थीबाट लिएको अतिरिक्त शुल्क फिर्ता गरेका छैनन् । एक मेडिकल कलेज सञ्चालकका अनुसार मेडिकल कलेज सञ्चालनमा केहिले गरेको गल्तिमा सबैलाई एउटै बास्केटमा राखेर सरकारले हेरेको आरोप लगाए ।

नेशनल मेडिकल कलेज वीरगञ्ज, युनिभर्सल मेडिकल कलेज भैरहवा, गण्डकी मेडिकल कलेज पोखरा, चितवन मेडिकल कलेजलगायतका कलेजले शुल्क बढी लिएको भन्दै विद्यार्थी नै आन्दोलनमा छन् ।

सरकारले मेडिकल कलेजहरुले लिइरहेको शुल्क र अन्य सुविधाका बारेमा राष्टिय सतर्कतकता केन्द्रमार्फत अध्ययन समेत गरेएको थियो । उक्त अध्ययनबाट पनि मेडिकल कलेजहरुले अवैध रुपमा लाखौ रकम उठाइरहेको देखाएको छ ।