काठमाडौं । शिवम् सिमेन्ट्स लिमिटेडको प्रस्तावित लाभांश सुरक्षित गर्ने कात्तिक १२ गते अन्तिम दिन रहेको छ । शिवम्ले प्रस्तावित लाभांश र आगामी साधारण सभा प्रयोजनका लागि कात्तिक १३ गते एक दिन बुक क्लोज गर्ने भएकाले असोज १२ गतेभित्र लाभांश सुरक्षित गर्नुपर्ने भएको हो । बुक क्लोजको आधारमा कात्तिक १२ गतेसम्म कायम शेयरधनीहरुले मात्र साधारण सभामा भाग लिन र लाभांश प्राप्त गर्न सक्नेछन् । 

कम्पनीले यो वर्ष २४ दशमलव २१ प्रतिशत नगद लाभांश दिने प्रस्ताव सहित कात्तिक २४ गते पाँचौ वार्षिक साधारण सभा बोलाएको छ । सभा कम्पनीको कर्पोरेट कार्यालय, अनामनगरमा विहान ११ बजे सुरु हुनेछ । सभामा शेयरधनीहरुलाई जुम मार्फत सहभागी गराईने कम्पनीको भनाई छ ।

 शिवम्को चुक्तापूँजी हाल ४ अर्ब ४० करोड रुपैयाँ रहेको छ । सोहि पूँजीको आधारमा शिवम्ले २४ दशमलव २१ प्रतिशत नगद लाभांश दिन लागेको हो । शिवम् सिमेन्ट्ले गत आर्थिक वर्षको चौथो त्रैमाससम्म  १ अर्ब ५ करोड ८४ लाख २९ हजार रुपैयाँ खुद नाफा गरेको थियो । यस कम्पनीको वार्षिक प्रतिशेयर आम्दानी २४ दशमलव शून्य ६ रुपैयाँ र प्रतिशेयर नेटवर्थ २०३ दशमलव ४३ रुपैयाँ रहेको छ ।