काठमाडौं । एनआइसी एशिया बैंकको स्वामित्वमा रहेको तिन कम्पनीको लिलामी शेयरमा आवेदन दिने फागुन १२ गते बुधवार अन्तिम दिन रहेको छ । बैंकले माघ ८ गतेदेखि आरएमडिसी लघुवित्त वित्तीय संस्थाको ४ लाख ३६ हजार ३६१ कित्ता ,माहुली सामुदायिक लघुवित्त वित्तीय संस्थाको ६१ हजार २०० कित्ता र मेरो माइक्रोफाइनान्स लघुवित्त वित्तीय संस्थाको ५ लाख ९८ हजार ५८९ कित्ता संस्थापक शेयरमा विक्री खुला गरेको हो । 

यी शेयर खरिद गर्न इच्छुक विद्यमान संस्थापक या जो कोही व्यक्ती तथा संस्थाले बुधवार कार्यालय समयभित्र गोप्य शिलबन्दी बोलपत्र पेश गर्न सक्नेछन् । बैंकले आरएमडिसी लघुवित्तको शेयरको हकमा न्यूनतम मूल्य प्रतिकित्ता रू. ५२३ , माहुली लघुवित्तको प्रतिकित्ता रू. ८१२ र मेरो माइक्रोफाइनान्स लघुवित्तको प्रतिकित्ता रू. ४६३  तोकेको छ । बोलकबोल गर्दा तोकिएको मूल्य वा सोभन्दा बढी मूल्य अंकित गर्नुपर्नेछ । 

बोलकबोल गर्दा न्यूनतम १०० कित्तादेखि अधिकतम सम्पूर्ण कित्तासम्म माग गर्न सकिनेछ । यो शेयर विक्री प्रबन्धकमा एनआइसी एशिया क्यापिटल लिमिटेड रहेको छ । मंगलवार महुँली सामुदायिक लघुवित्तको अन्तिम मूल्य रू. २ हजार ५०० , मेरो माइक्रोफाइनान्सको अन्तिम मूल्य रू. १ हजार १८५ र आरएमडीसी लघुवित्तको अन्तिम मूल्य रू. १ हजार १२० कायम भएको छ ।