काठमाडौं । नेपाल एग्रिकल्चर मार्केट डेभलपमेन्ट प्रोग्राम (एनएएमडीपी) दोस्रो चरण र आईडिया स्टुडियो नेपालले भूमी व्यवस्थापन कृषि तथा सहकारी मन्त्रालय प्रदेश नम्बर एक, पूर्वाञ्चल यूनिभर्सिटी स्कूल अफ म्यानेजमेन्ट र मोरङ व्यापार संघसँगको सहकार्यमा ‘एग्रि बिजनेस इन्क्युबेसन प्रोग्राम’ का लागि आवेदन खुला गरेको छ । 

आवदेनका लागि अक्टोबर १२ सम्म अन्तिम मिति रहेको छ । प्रदेश एक भरका इच्छुकहरुले मकै, दुग्धजन्य पदार्थ, तरकारी र अलैचीमा केन्द्रित रहेर आफ्नो व्यवसायिक आईडिया पेश गर्न सक्ने छन । पेश भएका आवदेनमध्ये एग्री विजनेस इन्क्युबेसन प्रोग्रामका लागि उत्कृष्ट दश आईडियाहरु सर्टलिस्टेड गरिने कम्पनीले जनाएको छ ।

 ती आईडिया पेश गर्ने प्रतिस्पर्धीहरुले १ हप्ता लामो वृहत उद्यमशिलता सम्बन्धि प्रशिक्षण बूटक्याम्प, पाँच महिना लामो मेन्टरशिप र व्यवसायिक विकास इन्क्युबेसनमा सहभागिताको अवसर पाउन सक्ने छन् । एग्रि बिजनेस इन्क्युबेसन प्रोग्राम अन्तर्गत सहभागीहरुले आफ्नो व्यवसायिक आईडियाबाट एउटा मूर्त प्रोटोटाइप, व्यवसायिक रणनीति र वित्तिय सहयोग पाएर मार्केट रेडी कमर्शियल प्रोडक्टको रुपमा आफूलाई विकास गर्न सक्ने छन । 

पत्रकार सम्मेलनमा प्राज्ञिक व्यक्ति, मिडियाकर्मी, उद्यमशिलताको क्षेत्रका कार्यरत पेशाकर्मीहरुको सहभागिता रहेको थियो । उक्त समारोहमा नेपाल एग्रिकल्चर मार्केट डेभलपमेन्ट प्रोग्राम (एनएएमडीपी) फेज २ की सुश्री रीमा श्रेष्ठले दोस्रो चरणको बारेमा जानकरी दिनु भएको छ । उनले यो कार्यक्रमको लक्ष्य मकै, अलैची, डेरी र तरकारीहरु ( चार क्षेत्रहरुमा कृषि व्यापार उत्पादनहरु वा सेवाहरु को मूल्य, सेवाहरु र प्रशोधनको लागी प्लेटफर्म प्रदान गर्ने बताए ।

पूर्वाञ्चल विश्वविद्यालयका उप डीन सोनीला शाक्यले पोखरा विश्वविद्यालयमा इन्क्युबेसन सेन्टरको सुरुवात तथा प्रदेश १ मा एग्रि विजनेस इन्क्युबेसन प्रोग्रामको आवश्यकता बारे आफ्नो मन्तव्य राखेका थिए ।  उप डीन सोनीला शाक्यले यस्ता कार्यक्रमले उद्यमीहरुलाई अझै नविनतम विचारहरु सोच्न प्रोत्साहन गर्ने धारणा राखे ।  

मोरङ व्यापार संघका अध्यक्ष प्रकाश मुन्द्राले एग्री बिजनेस इन्क्युबेसन प्रोग्राममा मोरङ व्यापार संघको संलग्नताका बारेमा छोटो मन्तव्य दिनु भयो। अध्यक्ष मुन्द्राले धेरै भन्दा धेरै स्टार्टअपहरुलाई आफ्नो व्यापार बजारीकरण गर्नको लागी प्रशिक्षित गर्न आवश्यक रहेको बताए । ‘धेरै देशहरु पहिले नै उद्यमी पारिस्थितिकी तंत्र को विकासमा लगानी शुरू गरिसकेका छन, र यो कार्यक्रम कार्यान्वयनद्वारा निश्चित रूपमा प्रदेश १ को धेरै भन्दा धेरै उद्यमीहरुलाई मद्धत गर्ने छ’,उनले भने ।
 
भूमि व्यवस्थापन, एग्रिकल्चर तथा सहकारी मन्त्रालयका पशुपति पोखेलले प्रदेश एकमा कृषि आधारित इन्क्युबेसन सेन्टरको आवश्यकताका बारेमा आफ्नो मन्तव्य राख्नु् भयो । साथै कार्यक्रममा  मन्त्रालयको  संलग्नताबारे जानकारी दिए । पोखेलले प्रदेश १ को उद्यमी पारिस्थितिकी तंत्र निर्माण गर्न खोजिरहेको बताउनुहुदै त्यसलाई बढावा दिनको लागी, साझेदार संगठनहरुबाट सबै प्रतिनिधि संस्थाहरु क्षमता विकास कार्यक्रममा समावेश हुने बताए । ‘ यो कार्यक्रम एक सुरुवात हो, र हामी आउने दिनहरुमा बिभिन्न क्षेत्रहरुमा यो जस्तै धेरै कार्यक्रमहरु आरम्भ गर्ने लक्ष्य राख्दछौं ’ उनले भने ।

कार्यक्रमको अन्त्यमा आईडिया स्टुडियो नेपालका कार्यकारी अध्यक्ष डा. छिरिङ लामाले प्रदेश एकमा इन्क्युबेसन सेन्टर सुरु गर्नुको उदेश्य प्रष्ट्याएका थिए ।  डा. लामाले भूमी व्यवस्थापन कृषि तथा सहकारी मन्त्रालय प्रदेश नम्बर एक, पूर्वाञ्चल यूनिभर्सिटी स्कूल अफ म्यानेजमेन्ट र मोरङ व्यापार संघ जस्ता स्थानीय संगठनसंग सहकार्य गर्न पाउँदा खुसी लागेको बताए ।

आइडिया स्टुडियो नेपाल विगत सात बर्ष देखि विभिन्न स्टार्टअप र व्यवसायहरु संग नजिकबाट काम गरी रहेको छ जानकारी दिनुहुदै क्षितिज विस्तार गर्न प्रदेश १ मा काम गर्न पाउँदा खुसी लागेको बताए ।