काठमाडौं । कोरोना बीमाको  रकम  भुक्तानी गर्ने तयारी भएको छ । लामो समयदेखि रोकिएको कोरोना बीमाको रकम भुक्तानी हुने भएको बीमा समितिले जनाएको छ । समिति  स्रोतका अनुसार कोरोना बीमा बापतको बाँकी रकम अर्थ मन्त्रालयले निकासा गर्न लागेपछि कोरोना बीमाको बाँकी रकम भुक्तानी हुन लागेको हो । 

यस अघि पुलमार्फत  ४ अर्ब ७८ करोड ८१ लाख रुपैयाँ दाबी भुक्तानी गर्ने दायित्व निजी बिमा कम्पनी र समितिको भएकाले उक्त रकम  भुक्तानी भइसकेको छ । त्योभन्दा माथिको दाबीको भुक्तानी सरकारले गर्ने सहमति भएको भए पनि सरकारको तर्फबाट रकम निकासा गर्न नसक्दा कोरोनाका बीमितले दाबी पाउन सकेका छैनन् । 

समिति स्रोतले भन्यो, ‘सरकारले केही रकम निकासा  गर्ने भएको छ । अरू बाँकी पैसा पुन बीमा  समिति र सम्बन्धित कम्पनीहरूले नै दिने छन् ।’ कोरोना बीमा विषम परिस्थितिमा लागू भएको हुनाले अब यसको दायित्व पुन बीमा समिति, बीमा  कम्पनी र पुनर्बीमा कम्पनीले नै दायित्व बहन गर्न पर्ने अबस्था आएको स्रोतले बतायो । 

नेपाल बीमक संघका महासचिव तथा नेको इन्स्युरेन्सका प्रमुख कार्यकारी अधिकृत(सिईओ) अशोक  खड्काले भने बीमा कम्पनीले  पुन कोरोना बापतको रकम दिने भन्ने विषयमा आफूहरुसम्म नआइसकेको बताए ।  उनले भने, ‘अर्थ मन्त्रालयले  कोरोना बीमाको रकम निकासा गर्दै छ भन्ने कुरा त मैले पनि सुनेको हो तर कम्पनीहरूले नै उक्त बीमाको दायित्व बहन गर्ने गरी निर्णय गरेको भन्ने कुरा मलाई थाहा छैन ।’

यस अघि पुलमार्फत  ४ अर्ब ७८ करोड ८१ लाख रुपैयाँ दाबी भुक्तानी गर्ने दायित्व बीमा कम्पनी र समितिको भएकाले उक्त रकम  भुक्तानी भइसकेको छ । त्योभन्दा माथिको दाबीको भुक्तानी सरकारले गर्ने सहमति  भएको भए पनि सरकारले रकम निकासा नगर्दा कोरोना बीतिमले दाबी पाउन सकेका छैनन् ।

बीमा समितिको तथ्याङ्क अनुसार हालसम्म कोरोना बीमामा  १४ अर्ब ९३ करोड ९६ लाख ६६ हजार रुपैयाँको दाबी परेको छ । हालसम्म कोरोना बीमा पुलमार्फत ३ अर्ब ५० करोड रुपैयाँ र बीमा कम्पनीहरूबाट १ अर्ब २८ करोड ८१ लाख ७१ हजार रुपैयाँ गरी ४ अर्ब ७८ करोड ८१ लाख रुपैयाँ दाबी भुक्तानी भइसकेको छ । कोरोना बीमा कार्यविधि अनुसार सरकारले अनुदानका रुपमा कोरोना बीमा दावीको बहन गर्ने भनेको ११ अर्ब ४३ करोड रुपैयाँ भुक्तानी गर्न बाँकी छ ।