काठमाडौं । इष्टर्न हाइड्रोपावर लिमिटेडको भदौ ७ गतेदेखि विक्रीमा आएको आईपीओ खरीदका लागि आवेदन दिने आज अन्तिम दिन रहेको छ । कम्पनीले आयोजना प्रभावित स्थानीयका लागि आईपीओ विक्री खुला गरेको हो । 

कम्पनीले प्रति कित्ता रू. १०० अंकित दरका ६ लाख २० हजार कित्ता साधारण शेयर आयोजना प्रभावित क्षेत्र भोजपुर जिल्लाका सम्पूर्ण स्थायी बासिन्दाका लागि निष्कासन गरेको हो । स्थानीयले न्यूनतम १० कित्तादेखि अधिकतम १ लाख कित्ताका लागि आवेदन दिन सक्नेछन् । कम्पनीको आईपीओ विक्री प्रबन्धकमा एनएमबि क्यापिटल लिमिटेड रहेको छ । 

उक्त आईपीओमा विक्री प्रबन्धकले तोकेको बैंक तथा वित्तीय संस्थाहरू तथा नेपाल धितोपत्र बोर्डबाट सी–आस्वा सदस्यता प्राप्त गरेका सम्पूर्ण बैंक तथा वित्तीय संस्थाहरू र तिनका शाखा कार्यालयबाट आवेदन दिन सकिने छ । विक्री प्रबन्धकले एनएमबि बैंक, ग्लोबल आइएमई बैंक, प्रभु बैंक र लक्ष्मी बैंक भोजपुर शाखाका साथै प्रभु बैंक हतुवागढीबाट पनि आवेदन दिन सकिन व्यवस्था गरेको छ ।

कम्पनीलाई केयर रेटिङ नेपाल लिमिटेडले केयर–एनपी बी प्लस रेटिङ प्रदान गरेको छ । उक्त रेटिङले समयमा वित्तीय दायित्व पुरा गर्न सक्ने सम्बन्धमा उच्च जोखिम रहेको जनाउँदछ । कम्पनीले भोजपुर जिल्लामा ५०० किलोवाट क्षमताको पिखुवा खोला साना जलविद्युत आयोजना निर्माण गरी २०७६ जेठ २७ गतेबाट विद्युत उत्पादन गरी विक्री गरिरहेको छ । 

वास्तविक वित्तीय विवरण अनुसार २०७७÷७८ सम्म कम्पनीको प्रतिशेयर नेटवर्थ रू. ७२ दशमलव ३३ छ भने प्रतिशेयर आम्दानी रू. ६ दशमलव ८७ ऋणात्मक छ । त्यस्तै कम्पनी उक्त समयसम्म रू. १३ करोड ७२ लाखसञ्चित नोक्सानीमा रहेको छ ।