काठमाडौं । पुस १९ गतेदेखि विक्रीमा आएको मोलुङ्ग हाइड्रोपावर कम्पनी लिमिटेडको आईपीओ माघ १० गतेसम्म विक्रीमा रहने भएको छ । कम्पनीले आयोजना प्रभावित स्थानीयका लागि आवेदन दिने अवधि थप गरी माघ १० गतेसम्म कायम गरेको हो । 

पहिलो चरणमा आयोजना प्रभावित स्थानीय र वैदेशिक रोजगारीमा गएका नेपाली कामदारका लागि कम्पनीले आईपीओ विक्री खुला गरेको हो । वैदेशिक रोजगारीमा गएका नेपाली कामदारले भने आजसम्म मात्र आवेदन दिन सक्नेछन् ।

कम्पनीले जारी पूँजी रू. ८० करोड २५ लाखको १० प्रतिशतका दरको रू.  ८ करोड २ लाख ५० हजार बराबरको ८ लाख २ हजार ५०० कित्ता शेयर आयोजना प्रभावित क्षेत्रका बासिन्दाहरुका लागि र २ लाख ७२ हजार ८५० कित्ता वैदेशिक रोजगारीमा गएका नेपालीका लागि निष्काशन गरेको हो । 
आयोजना प्रभावित क्षेत्रका बासिन्दाहरुका लागि निष्काशन गरीएको १० प्रतिशत शेयरमध्ये ५ प्रतिशत ओखलढुङ्गा जिल्लाको मोलुङ्ग गाउँपालिकाका बासिन्दाहरुमा विक्री गरिनेछ भने २ दशमलव ५ प्रतिशत सुनकोशी गाउँपालिकाका बासिन्दा र २ दशमलव ५ प्रतिशत सिद्धिचरण नगरपालिकाका बासिन्दाहरुमा विक्री गरिनेछ । लगानीकर्ताहरूले यो आईपीओ खरीदका लागि न्यूनतम १० कित्तादेखि अधिकतम ८ हजार कित्तासम्म माग गर्न सक्ने व्यवस्था छ । 

कम्पनीको शेयर निष्काशन तथा बिक्री प्रबन्धक सनराइज क्यापिटल लिमिटेड रहेको छ । आयोजना प्रभावित क्षेत्रका बासिन्दाहरुले सनराइज बैंक, माछापुच्छ्रे बैंक, मुक्तिनाथ विकास बैंक, कुमारी बैंक तथा लक्ष्मी बैंकका तोकिएका शाखा कार्यालयबाट आवेदन दिन सक्नेछ । कम्पनीले आईपीओ निष्काशनका लागि गराएको रेटिङ्गमा इक्रा नेपालले वित्तीय दायित्व बहन गर्ने क्षमतामा औषत जोखिम रहेको संकेत इक्रा एनपी इस्यूअर रेटिङ्ग डबल बी प्रदान गरेको छ ।

कम्पनीले ओखलढुङ्गा जिल्लामा ७ मेगावाटको क्षमताको मोलुङ्गखोला जलविद्युत आयोजना निर्माण गरेको छ । कम्पनीले २०७४ साल चैत १२ गतेदेखि उक्त आयोजनाबाट विद्युत उत्पादन गर्दै आएको छ । यस आयोजनाको प्रति मेगावाट लागत निर्माण अवधिको ब्याजसहित रू. २० करोडभन्दा बढी रहेको छ भने आयोजनाको कुल अनुमानित लागत रू. १ अर्ब ४५ करोडभन्दा बढी रहेको छ ।