
काठमाडौं । आँखुखोला जलविद्युत कम्पनी लिमिटेडले असार २२ गते १५औं वार्षिक साधारण सभा बोलाएको छ । जेठ २६ गते बसेको कम्पनीको सञ्चालक समितिको बैठकले अर्पण व्यङ्क्वेट, नयाँ बानेश्वर, काठमाडौंमा विहान ११ बजे सभा गर्ने निर्णय गरेको हो ।
सभाले गत आर्थिक वर्ष ०७८/७९ सम्मको वार्षिक प्रतिवेदन सहितका वित्तीय विवरणलाई पारित गर्नुका साथै १५० प्रतिशत हकप्रद शेयर विक्रीको प्रस्तावलाई समेत स्वीकृति प्रदान गर्नेछ । कम्पनीले हाल कायम चुक्तापूँजी रू. ८० करोडको आधारमा हकप्रद शेयर निष्कासन गर्न लागेको हो । कम्पनीले उक्त हकप्रद शेयर विक्री गर्न विद्युत नियमन आयोगबाट पूर्व स्वीकृति पाईसकेको छ ।
जलविद्युत कम्पनीहरूले हकप्रद शेयर निष्कासनका लागि नेपाल धितोपत्र बोर्डमा आवेदन दिनुपूर्व विद्युत नियमन आयोगबाट पूर्व स्वीकृति लिनुपर्ने व्यवस्था छ । सोही व्यवस्था बमोजिम कम्पनीले हकप्रद निष्कासनका लागि विद्युत नियमन आयोगबाट पूर्व स्वीकृति लिएको हो । वार्षिक साधारण सभाबाट हकप्रदको प्रस्ताव पारित गराएपछि कम्पनीले नेपाल धितोपत्र बोर्डमा निवेदन प्रक्रिया अघि बढाउनेछ ।
कम्पनीले गणेश हिमाल हाइड्रोपावर प्रालिले प्रबद्र्धन गर्न लागेको २० मेगावाट क्षमताको आँखुखोला–२ जलविद्युटत आयोजनामा कम्तीमा ६० प्रतिशत लगानी गर्न सञ्चालक समितिले गरेको सम्झौता अनुमोदन समेत सभाले गर्नेछ ।
साधारण सभा प्रयोजनका लागि कम्पनीले असार ३ गते एक दिन बुक क्लोज गर्न लागेको छ । बुक क्लोजको आधारमा जेठ ३२ गतेसम्म कायम शेयरधनीहरू मात्र कम्पनीको सभामा भाग लिन सक्नेछन् । हकप्रद प्रयोजनका लागि भने कम्पनीले बोर्डबाट स्वीकृति प्राप्त भएपछि मात्र बुक क्लोजको मिति तय गर्नेछ ।
प्रतिक्रिया दिनुहोस