काठमाडौं। काभ्रेस्थली वडा न.२ स्थित काभ्रेस्थली कृषि सहकारी संस्थाको नवौं वार्षिक साधारण सभा सम्पन्न भएको छ। सभाको उद्घाटन प्रमुख अतिथि तार्केश्वर नगरपालिकाकी उपप्रमुख सृजना ब्रुलाकोटीले गरेकी थिइन्  ।

उक्त साधारण सभामा उपप्रमुख ब्रुलाकोटीले सहकारीले समाजमा उल्लेख्य योगदान गर्न सक्ने बताएकी छिन् । उनले  सहकारीहरूले अब ठुलो परिणामको नतिजा दिनका लागि सहकार्य गर्नुपर्ने समेत बताइन् ।

विशेष अतिथिका रूपमा नगर सहकारी कार्यालय प्रमुख तीर्थराज थापा मगर,अतिथिका रूपमा नगर कृषि कार्यालय प्रमुख मिना थापा,नगर पशु सेवा प्रमुख धनपति राय यादव,तार्केश्वर वडा न.– २ का वडाध्यक्ष राधाकृष्ण खड्गी,काभ्रेस्थली स्वास्थ्य चौकी प्रमुख विजय कुमार देव,स्वयंसेवी रक्तदाता समाजका अध्यक्ष राधेश्याम फुयाँल ‘शर्मा’ लगायतको उपस्थिति थियो।

सभामा संस्थाका अध्यक्ष रामसुदन भण्डारीले वार्षिक प्रगति प्रतिवेदन प्रस्तुत गरेका थिए । प्रतिवेदन अनुसार संस्थाले गत आर्थिक वर्षमा  दुई करोड पचहत्तर लाख अठचालिस हजार पाँच सय अन्ठाउन्न रुपैयाँ  निक्षेप  सङ्कलन गरेको छ जुन गत आर्थिक वर्षको भन्दा  २३.०८ प्रतिशतले वृद्धि भएको हो ।  गत आर्थिक वर्षमा निक्षेप  दुई करोड तेइस लाख एकासी हजार सात सय त्रियासी रुपैयाँ सङ्कलन भएको थियो। 

कार्यक्रममा संस्थाले लक्ष्मी बिडारी र शरदचन्द्र अधिकारीलाई उत्कृष्ट बचतकर्ताको रूपमा सम्मान गरेको थियो। साथै उत्कृष्ट ऋणीको रूपमा 
कुमार खड्गी र राम बिकलाई सम्मान गरेको थियो । कार्यक्रममा विशेष अतिथी शखरापुर नगरपालिका प्रमुख सुवर्ण श्रेष्ठ लगायतले शुभकामना मन्तव्य राखेका थिए।